Category Archives: Media

හිමි දෙසූ බණ අසා ඇතිමුත් ………!


කලින් ලියපු කොටසට අමුනන්න අදහසක් නැහැ. නමුත් මේත් එහි දිගුවක්. අධ්‍යාපනවේදීන් කරපු පර්යේෂණ වලින් සනාත වන්නේ, දරුවෙකුට හෝ වැඩිහිටියෙකුට දේශණයක් කිරීමේදී විනාඩි 20 න් පමණ පසු, කියන දේවල් වැඩක් වෙන්නේ නැහැ කියා. සමහර විශ්ව විද්‍යාල ආචාර්ය වරුන් පවා, ඉගැන්විමේදී මෙය අවධානයට ගන්නවා.

දැන් මා පටන් ගත්තේ කුඩා කාලේ ලබපු ආකල්ප ගැනනේ. අතීතයේ සිදුවුණ දේවල් අපට වෙනස් කරන්නට නොහැකියි. නමුත් අතීතය අපට උගන්වන හැටි, අතීතය අප ඉගෙන ගන්නා හැටි අපට වෙනස් කර ගන්න පුළුවන්.

රටකින් රටකට ඇවිත්, මුල් දවස් ටිකේ පණ ගැට ගහගන්න විතරක් නොවේ, රටේ ජිවත් වෙමින් හිටිය අනික් මිනිසුන්ට වැඩේ දෙන්න කෙනෙකුගේ උදව් අරන්, පස්සට පයින් ගහල කැලේට පන්නන එක හොඳ වැඩක් නම් නොවේ. එතැනදී තමන්ගේ දරුවන් එක්ක පස්සට දෙකක් දීල පැන්නීම එයිටත් නරක දෙයක්. විජය, අපේ කුවේනියට කෙරුවේ අන්න ඒ වගේ දෙයක්.

මිනිස් ඉතිහාසය පුරාම වෙනත් රටවල් වලින් ඇවිත්, තිබුන ශිෂ්ටාචාර වෙනත් ශිෂ්ටාචාර වලින් ප්‍රතිස්ථාපනය කිරීමේදී සිදු වුණේ ඔයිට සමාන දේවල්. ඈත අතීතයේ සිදුවුණ දේවල් වල ම්ලේච්චත්වය අප හරියට දන්නේ නැහැ. නමුත් මෑත කාලයේ ඇමෙරිකාවේ හා ඕස්ට්‍රේලියාව වගේ රටවල් වල සිදු කෙරුණ මේ ප්‍රතිස්ථාපනයේ දරුණු වගට සාක්ෂි ඕනේ තරම් තියනවා.

දරුවනට ඉතිහාසය කියා දීමේදී, මිනිසුන් කරපු ඓතිහාසික වරදවල් හා අමානුෂික කම් ද දරුවනට කියා දෙන්න අවශ්‍යයි. මේවා එලෙස කියා නොදීම නිසා, දරුවන් ලොකු මහත් වුණත්, අතීතයෙන් ඉගෙන ගත යුතු පාඩම් ඉගෙන ගන්නේ නැහැ. එවැනි කෙනෙක් කසාද බැඳලා, නෝනා රට යවලා, ඒ එවන මුදල් වලින් ජෝගි නටල, වෙන ගැහැණු කෙනෙක් එක්ක යන්නේ අර කුඩා දරුවන් ලෙස උත්කර්ෂයෙන් උගත් අතීතය නිසා වෙන්න පුළුවන් නේද?

දෙදෙනෙකු එක වහලක් යට කාලයක් ජිවත් වෙන කොට, ගැලපිය නොහැකි අසමානකම් දිගින් දිගටම මතු වෙනවා නම්, පිළියම වෙන් වීම තමා. නමුත් තමන් ජනිත කරපු දරුවන් රැක බලා ගැනීමේ වගකීමෙන් ගැලවෙන්නට දෙපැත්තටම නොහැකියි. නීතිමය සම්පාදන අමතක කරමුකෝ. නමුත් තමන්ගේ වගකීම අමතක කරන්නට නොහැකියි.

ඒ වගේම කාන්තාවන්ට පහර දීම කොයිම තත්ත්ව යටතේ හෝ සාධාරණීයකරණය කරන්න බැහැ. ගර්භනී මවකට පහර දීම තිරිසන් ක්‍රියාවක් කියා කියන්න බැරි, ගැබ්බර සහකාරියට පහර දෙන තිරිසන් සතුන් ගැන වාර්තා වී නොමැති නිසා. එමෙන්ම සහජ ඥාණය මගින් ජිවත් වන තිරිසනුන්, තම දරුවන්ට ලිංගික ක්‍රියා කරන්නේ නැහැ. දරුවන් කුඩා කාලයේ ඔවුන් ආරක්ෂා කරන්නේ සහජයෙන් එන ඥාණය නිසා. ඔවුන් ලොකු වුනහම එම තත්වය වෙනස් වනවා තමයි. මොක උන්ගේ බැඳීම එතකොට වෙනස් වනවා. මොකද අර සහජ ඥානයේ සිතන්නට හැකියාවක් නැහැ.

දැන් තමන්ගේ දරුවන් පාසල් ගොස් එනතුරු බලා ඉන්න තාත්තලා ඉන්නේ ලංකාවේ පමණක් නොවේ. නමුත් ලංකාවෙන් වාර්තා වෙන දෙයක් තමා මෙවැනි දරුවන්ට අතවර කරන තාත්තලා. තිරිසන් ලෝකයේ නැති චර්යාවක්, හෝමෝ සාපියන්ස්ලා අතර මතු වන්නේ ඇයි? පත්තර වල වාර්තා වන්නේ ඇත්තටම සිදුවන ප්‍රමාණයෙන් කුඩා ප්‍රතිශතයක් කියා උපකල්පනය කෙරුවොත්, මේවා අහඹු සිදුවීම් නොවේ කියල බැලූ බැල්මට පෙනෙනවා.

පරම්පරාවෙන් උරුම කර දෙන ආගම්, නිසි විචාරයකින් තොරව ජිවිතයට එකතු කර ගත්තු පිරිස් වලින් මට දකින්නට ලැබෙන දෙයක් තමා, මේවායින් කියන දේවල් වලට සහමුලින්ම විරුද්ධ දෙයයි මෙයාල කරන්නේ කියන එක. වසර දහස් ගානකට හිටපු මිනිසෙක්, මිනිසුන් හදා ගත්තු වැටකඩොලු සියල්ල බිඳ දමන විට, විසි එක්වන ශත වර්ෂයේ ඉන්න අයියලා ප්‍රාග්-ඓතිහාසික යුගයට යනවා.

දැන් මේ අපට පෞද්ගලිකව හෝ කරන්න බැරි දේවල් මහා සමාජයෙන් බලාපොරොත්තු වෙන එක සාධාරණද? එහෙම බලාපොරොත්තු වුනත් ඇති දෙයක් තියනවද? මෙය නම් සනාතනික ප්‍රශ්න දෙකක්.

කුඩා දරුවන් ලෙස අප ලබන දැණුම හා ආකල්ප ගලේ කෙටූ අකුරු මෙන් මනසේ ජිවිත කාලය පුරාම හොල්මන් කරනවා. මා මේ කතාවේ මුල් සටහනේ අවසානයට කියුවේ අන්න ඒකයි. බොරු කියන්න අවශ්‍ය නැහැ, මාත් ලබා ගත්තු ආකල්ප අදත් වෙනස් කර ගන්න උත්සහ කරනවා.

රටක් හා සමාජයක් විදිහට පමණක් නොවේ, මිනිසෙක් විදිහටත් නුතනත්වයට පියවර නැගීමේදී, අන්තර්ජාලය අපේ අධ්‍යාපනයේ මුලික මෙවලම බවට පත් වේවි යයි මා විශ්වාස කරනවා.

වශී බෝල මේවායින් ප්‍රචාරය වෙනවා තමා, බෙලි ගසා දැමීම, ම්ලේච්චත්වයන් මේකෙන් ප්‍රචාරය වෙනවා තමා. අවිද්‍යාව ප්‍රචාරය වෙනවා තමා. නමුත් ඒ සියල්ල අතර, මිනිස් නිදහස පිලිබඳ පණිවුඩය, සභ්‍යත්වය, අලුත් දැනුම සමගින් නුතන මිනිසා නිර්මාණය කිරීමේ විශේෂ කාර්යයක් මේ අන්තර්ජාලය කරාවි. දූෂණය හා යටිමඩි ගැහීම් පිටු දකින, වඩාත් සාධාරණ සමාජයක් හා ආර්ථික සමුර්ධියක් ලබා ගැනීමේ පදනමත් දමා ගන්න පුළුවන් එවැනි මිනිසෙකු නිර්මාණය මගින්. මේ දෙක එනම් වඩාත් පැතිරුණු අන්තර්ජාලයක් හා යහපත් සමුර්ධිමත් සමාජයක් කියන දෙක අන්‍යෝන්‍ය බැඳීම් සහිතයි.

අන්තර්ජාලයට බැඳීම් දැමීම දැල් බැඳ සුළං නැවතීමට උත්සහ කරනවා වගේ තමා. එසේ සුළං නවතන්න විශාල පරිශ්‍රමයක් ගන්නා රටක් තමා චීනය. එවැනි පාලන ක්‍රම ස්ථාපනය කර ගන්න දත කන අන්තර්ජාල මල්ලිලා පෙන්නුම් කරන්නෙත් නුතන මිනිසෙකුගේ අවශ්‍යතාවයයි. ඒ ගැන කියවමුද?

Advertisements

5 Comments

Filed under Lifestyle, Media, Opinion