Category Archives: Migration

ජීවිතය, සංක්‍රමණය හා කරවල!


ඔන්න යාළුවනේ, අද අපට අහන්න ලැබුන ප්‍රවුර්ති අතර, පසුගිය වසරේ ඕස්ට්‍රේලියාවට එන්න දුන්න සංක්‍රමණික වීසා ගණන අඩුවීමත් ප්‍රධාන එකක් වූවා. හරියටම කියුවොත් පසුගිය වසරේ ඕස්ට්‍රේලියාව ගෙන්නා ගෙන තියන සංක්‍රමණිකයන් සංඛ්‍යාව 162, 417 ක් පමණයි. මා පමණයි කියුවේ, එය ලොකු ගණනක් වුවත්, එය එයිට කලින් අවුරුද්ද හා සසඳා බලන විට 10% ක පහළ  වැටීමක් විතරක් නොවේ, පසුගිය දශකය තුල, අවුරුද්දකට ගෙන්නා ගත් අඩුම සංඛ්‍යාවත්.

පසුගිය කාලය තුල ලෝකය පුරාම (බටහිර) සංක්‍රමණික විරෝධයක් කරලියට ආව බව රහසක් නොවේනේ. එයට ලැබෙන මහජන සහාය, පුවත් වල කියවෙන තරම් විශාලද කියන එක, ප්‍රශ්නාර්ථයක් වුවත්, සෑහෙන කොටසකගේ සහය තියන වග දකින්නට තියනවා. එම කොට්ටාශ වල ඉහලින් ඉන්නේ කවුරුන් වුවත්, සහය දෙන සාමාන්‍ය ජනතාව වන්නේ, පසුගිය දශක කිහිපය තුල, මේ රටවල් වල ආර්ථික වර්ධනය සමගින්, අඩුම ප්‍රතිලාභ ලැබූ පිරිසයි කියා මා දකින දේ අනුව උපකල්පනය කරනවා.

සීතල  යුද්දය අවසානයත්, එයටම එකතු වූ චීන හා ඉන්දියානු ආර්ථික නැගීමත් සමග මේ රටවල් වල විශාල පිරිසක් නොතකා හරිනු ලැබුවා. එයින් ගොඩක් පිරිස් අයත් වන්නේ, චීනයට හා ඉන්දියාවට ගෙන ගිය කර්මාන්ත වලට සෘජුවම සම්බන්ද වූ අයයි. මේ ක්‍රියාවලිය නිසා අධිකව ලාබංශ උපයා ගත් සමාජයේ ඉහල ඇවරිම, තමා සමහර රටවල් වල, සංක්‍රමණ විරෝධී ව්‍යාපාර වල පෙරමුණේ ඉන්නේ. එය ඔවුන්ටම පරාවලල්ලක් වනු ඇතැයි, අද දකින දේවල් අනුව මා සිතනවා.

ඊයේ පෙරේදා මා කියුව යමක් නිසා, කෝපයට පත් වූ අපේ ලාංකික සංක්‍රමණිකයෙක් කියුවේ, සුද්දන්ට වැඩ බැරි නිසා තමා අපව ගෙන්න ගන්නේ කියා. ඕස්ට්‍රේලියානු සංක්‍රමණික විසා ගත්තොත්, වසරකට දෙන වීසා  වලින් තුනෙන් දෙකක් කුසලතා සංක්‍රමණිකයන්ට හා ඉතිරි තුනෙන් එක පවුල් එකතු කිරීම් වලටත් වෙන් කරනවා. අරයා කියුවේ අර තුනෙන් දෙක දෙන්නේ මෙහෙ ඉපදුන අයට වැඩ බැරි නිසා කියලනේ.

අද ඉදිරිපත් වූ, සංක්‍රමණික විසා දීම අඩු කිරීම ගැන කර්මාන්ත කරුවන් හා වෘත්තියන්ට සම්බන්ද සමිති සමාගම් නොසතුට පළ කර තිබුණා.  සංක්‍රමණික විරෝධී ස්ථාවරයක ඉන්න වග පෙනන, අපගේ ආගමන හා විගමන ඇමති කියුවේ, මේ අඩු කිරීම් සමාජයේ පවතින නිවාස  හා යටිතල පහසුකම් ගැන ඇති කනස්සල්ල සලකා බලා ගත්තු තීරණයක්ය කියා.

ඕස්ට්‍රේලියාව කුසලතා යටතේ වීසා  දෙන්නේ සුද්දන්ට වැඩ බැරි නිසාද යන පුරස්නයට ගියොත්, එය අර්ධ හෝ නාමික සත්‍යයයක් පමණනේ. පසුගිය අවුරුදු සියවස් ගණනක් තුල නොකඩවා, බටහිර සිදුවුණ ආර්ථික වර්ධනය සමගින් වූ අනෙක් දෙය නම් ජනගහන වර්ධනය අඩුවීමයි. එයටම බැඳුනු අනෙක් කරුණ තමා මේ රටවල් වලට නිරන්තරයෙන් ඇදී ආ කුසලතා වලින් පිරි සංක්‍රමණික පිරිස්. එම සංක්‍රමණය නිසා ප්‍රතිලාභ ලැබුවේ, එම සංක්‍රමණිකයන් පමණක් නොවේ. මේ රටවල් බොහොමයක ආර්ථික වර්ධන වේගය එම මට්ටමේ තියා ගන්න, සංක්‍රමණිකයන්ගේ දායකත්වය අවශ්‍යම එකක් වූවා.

සංක්‍රමණිකයන්ට විරෝධය දක්වන සාමාන්‍ය ජනතාවගේ ජීවිතය, ඔවුන් අද ඉන්න තැනටත් වඩා පහලට වැටෙන වග තමා දත්ත නම් පෙන්වන්නේ. ඕස්ට්‍රේලියානු පෙඩරල් ආණ්ඩුවට දුන්නු වාර්තාවකට අනුව, ඕස්ට්‍රේලියාව වසර 2014/15 තුල ගෙන්න ගත්ත පිරිස, ඉදිරි අවුරුදු 50තුල මෙහි ආර්ථිකයට කරන දායකත්වය ඩොලර් බිලියන 10ක් කියා ගණන් හදා තියනවා. 

පසු වදන

ලංකාවේ සංක්‍රමණිකයන් ද කරන එක දෙයක් තමා, එකිනෙක හා සසඳන්න බැරි දෙකක් අරන්, එව්වා සැසඳීම. එයින් මුල්ම තැන ගන්නේ තමන්ගේ දරුවන්, අනික් අයගේ දරුවන් හා සැසඳීම. මේවා ගැන, මේ බ්ලොගය පටාන් ගත්, මෙයට වසර 7කට පෙර වොරි  වුන තරම් වත් මා අද වොරි  වෙන්නේ නැහැ. අපගේ දරුවන්, එම ලෝකයෙන් අයින් කරපු එක ගැන, ඔවුන් සැසඳීමක් කරනු ඇත්තේ අනාගතයේ.

අප විවිධ දෙනා සතුට ලබන හැටි, අනෙක් දේවල් කරනවා වාගේම වෙනස්. ජීවිතය සසඳා බලා සතුටු වීම නරකම දෙයක් කියා කියන්නත් බැහැ.  සංක්‍රමණය ගැන මගේ අදහස විවිධ මාතෘකා ඔස්සේ ලියා ඇති.  මේ ලඟදි මගෙන් සමීපතමයෙක් ඇහුව, ලංකාවේ නැවතුන එයාල, නොලබපු එහෙත්, අප මෙහෙදී ලබා ගත්තු දේවල් මොනවාද කියා.  එහෙම දේවල් තියනවද නැතිද යන්න ගැන ස්ථිරවම මට කියන්න හැකි කමක් නැත්තේ, මේ රටවල් දෙකේම එක විට මා ජීවත්වී  නොමැති නිසා.

එවැනි සැසඳීමක් නොමැතිව ජීවිතය ගැන තමා ගොඩක් විට මා ලියන්න උත්සහ අරන් තියෙන්නේ. එවැනි අවස්ථා වලත් සැසඳීම් නම් කර ඇති, විස්තර කිරීමේ පහසුව තකා.

 

 

 

Advertisements

2 Comments

Filed under Migration, Opinion