Tag Archives: ළමා කාලය

වැව් ඉවුර!


ඊයේ පෙරේදා දිනක, නිදියන්නට කිට්ටු වෙලාවක, ගොරවමින් වහින්න ගත්තු වෙලාවේ ඉලෙක්ට්‍රොනික දේවල් සියල්ල නිවීමට සිදු වූ නිසා, රාක්කයක තිබුන පොතක් කියවන්න ගත්ත. ඉස්සර වගේ නොවේ, එක දිගට යමක් කියවීම දැන් කරන්න අමාරුයි. මේ පොත නම් මා කලින් කියවා තුබුණු Roald Dahl ගේ Ah, Sweet Mystery of Life (Penguin Books, 1989) කියන කෙටි කතා පොත.

IMG_0158 (2)

එයා 1946 යුද්දේ ඉවර වුණු  විට යලි එංගලන්තයට ගොස් ගත කරපු කාලයේ තමා මේ කෙටිකතා පෙළ ලියවී තියෙන්නේ. එවකට තිස් වැනි වියෙහි හිටිය ඔහු, අම්මගේ නිවසේ තමා නැවතී තියෙන්නේ. ඔහු පෙරවදනෙහි මෙහෙම කියනවා … First, we were in Great Missenden, and later we moved a few miles away to the High Street in Old Amersham. This was fine Buckinghamshire country with rolling hills and beechwoods and small green fields….

IMG_0159 (2)

ඔය කාලේදී එයා කර තියෙන්නේ කෙටි කතා ලිවිම. එසේ ලියන කතා පත්තර හා සඟරා වලට යවා තියනවා. පොතකට තරම් කතා එකතු වූ විට පොතක් පළ කර තියනවා. ඒ කාලයේ ජීවිතය ගෙවුන හැටි රෝල්ඩ්  විස්තර කරන්නේ මෙහෙමයි…It was a pleasant leisurely life entailing about four hours work a day, seven days a week. I enjoyed it and I now realise how fortunate I was in being able to come up with a new plot whenever I needed one. This routine of four hours a day and never any more left me plenty of time for messing around with other things….

IMG_0160 (2)

මේ කාලයේ ඔහුට මුණ ගැසුණු තවත් කෙනෙකු (Claud) සමග කරපු දේවල් තමා මේ කෙටිකතා වලට පාදක වී තියෙන්නේ. පොතට මේ පෙරවදන ලියා ඇත්තේ 1989 දී. එය අවසන් කර තියෙන්නේ මෙහෙමයි…The stories in this book all grew out of my experience with Claud. They were written at the time when we were together, in the late 1940s, and reading them again now fills me with acute nostalgia and with vivid memories of those sweet days many years ago.

මේ ක්ලෝඩ් කියන කෙනා ලිවීමට කියවීමට එතරම් උගත් අයෙකු නොවේ. ඔහු මස් කඩේ කවුන්ටරේ වැඩ කර තියෙන්නේ. මේ කෙටි කතාත් ජිවිතයේ එදිනෙදා වුණු දේවල් වටා ගොඩ නැගුනු සරල කතන්දර.

IMG_0162 (2)

ඔය පෙරවදන කියවන විට මට මතක් වුණේ, මගේ ළමා කාලය හා ජිවිතයේ ලංකාවේ ගතවුණු කොටස. මට අතීතය ගැන ලොකු නස්ටල්ජියාවක් ඇති වෙනවා කියුවොත් බොරුවක්. හැබැයි, උපන් රටින් පිටට ඇවිත් ගත කරන ජීවිතය හා ජිවිතයේ මුල් කාළය ගැන සිතන විට මිශ්‍ර හැඟීම් සිතට නැගෙනවා.

නිවාඩුවට ලංකාවට යන්න තිබුණා නම් හොඳා. නමුත් මේ වසරේ යාමට හැකියාවක් නැහැ. ගොඩක් දෙනා වගේ, යලි සුපුරුදු කෑම කන්න යාමට, පුරුදු වටාපිටාවේ ඉන්න ආදී වශයෙන් ආසාවක් දැනෙනවා කියුවොත් එයත් ලොකු ඇත්තක් නොවේ. නමුත් සුපුරුදු බවක් නොදැනෙනවා කියුවොත් එයත් බොරුවක්. ඒ සුපුරුදු බවේම නුපුරුදු බවකුත් තියනවා. ඒ කියන්නේ සමහර අවස්ථාවල හා සිදුවීම් (මගතොටේ, කඩවල් වල)  වලදී, ටික කාලයකට නේද කියන සිතිවිල්ල සහනයක් ගෙනෙනවා. මා එහෙම ලියන්නේ නරක අදහසකින් නොවේ.

IMG_0163 (2)

දෙමාපියන් ඇතුළු එක්ස්ටෙන්ඩඩ් ෆැමිලි එකෙන් ඉවත් වී ජිවත් වීම ටිකක් අමාරු දෙයක්. අපේ දරුවන්ට පවා එම අඩුව තියනවා. දෙසැම්බර කියන්නේ අපගේ කුඩා කාලයේ, නෑදයන් එක්කෝ අපව බලන්න ආ කාලය, නැත්නම් අප විවිධ පළාත් වල ජීවත්  වුණු, ඔවුන්ව බලන්නට ගිය කාලය. අපේ අම්මල තාත්තල පමණක් නොවේ, ඔවුන්ගේ සහෝදර සහෝදරියන් ගෙන්ද සැලකිය යුතු පිරිසක් ගුරුවරුන් වීමත් එයට හේතු වෙන්න ඇති.

ලංකාවට යන්න කලින් විවිධ දේවල් කරන්න හිටියත්, විවිධ හේතූන්  නිසා, ගියාට පසුව ඒ දේවල් කරන්න වෙන්නේ නැහැ. විශේෂයෙන් මට ඕනේ විදිහට උයන්න ලැබෙන්නේ කලාතුරකින්. අනික, අපට නිවාඩු වුණාට, ගිය විට ගොඩක් දෙනා වැඩ නිසා, සමහරවිට කෙනෙක්ව හමු වීමත් අසීරුයි.

කොහොම වුනත් රෝල්ඩ් විස්තර කරන දිනකට පැය හතරක්, තමන්ට කැමති විට වැඩ කර, අනෙක් කාලය වෙනත් දේවල් වලට යොදවන්න හැකි නම් ඔබ එයට කැමතිද? හයියෝ, කවුද එවැනි දෙයකට අකමැති කියා ඔබට සිතුණොත්  මා පුදුම වන්නේ නැහැ.

 

 

 

 

Advertisements

Leave a comment

Filed under Photography, Reflections